Balad Arkréolozik

Epopé Dékolonial

In vwayaj épik dann fonntrip La Rénion, pou dékonstip nout rogar si listwar.

Mélopé néo-tipik pou kass la sèn, pou armèt kari si dori.

Nous sommes les empêcheurs de tourner en rond.

Nou pèz si la ké pou war si la tèt i bouz.

La brèz la éteinn ? Pa bezwin gran soz pou ralim ali.

Anpliskesa nou pé kont si la fors kréatris Maronèz pou done lo la, sak ti pa i kont pou fé lèv nout Shakti.

Nou trouv la sinbioz dan santié maron, nou tradui pou zot zistwar piébwa : parkoman Ti Zane la èd Ti Moussa kont larmé KaboZandarm.

O pir si lo kor lé mouran, nou plonz dan gran bassin ek zistwar dizuit é plish.

Tfason ma di aou in nafèr : in zistwar, lé pa in zistwar si na pwin in Ti Zan i kine la ras Grandyab.

Koman dan tousa trimarkaz kolonial, lo ti i gyin anpar lo gro ? Koman in ti ash i gyin koup grobwa ?

Par kel mirak, sak na toupé, i pé tout ek in pé ?

In bouké zistwar néo-tipik lé né dan fournèz nout trip, parti dékrak son kadav dan la mèr siklonik, pou sort dan zot mashine-à-ilizion.

Ban né-griyé i kri anou teroris… stress pa lo bato !

Nout toupé nout kartoush,
Nout zistwar nout fiziy
Paré pa paré ?
Kriké ?
Kraké ?
Sas !
Sas kosa ?
Bébèt kolonial.