Kosasa ?
Balad Arkréolozik i propoz aou dékouv listwar an siyonaz dan santié maron sanb zartis. Nout ban mizansèn lé bazé si in travay rosèrs si listwar, si la biodiversité, si lidantité réyonèz ansanb son filozofi ek son poézi.
Ban zarkéolog i fouy souvandéfwa dan rapor sasèr maron pou aprann listwar, an minm tan lé normal, la efas tout zarshiv, i rès anou ryink zistwar mantèr groblan indémnizé a labolision pou konprann nout listwar. Sé la larkréolog i zwé son rol : li fouy dan son trip pou dékonstip lo rogar si listwar : gras lo travay zistorien kaf, malgas, malbar, mé osi ban zantropolog, ban zastrolog konekté sanb linvizib, dan fénwarsité maniétik, pou rotrouv nout klèrvwayans, pou fé lèv nout fièrvayans.
Nout fason fé
Angarot in ligatir artistik rant la Natir, Lo Moun ek Listwar, pou vwayaj in ot maniyèr, dan nout péi tout koulèr.
Armet lo Moun, son zistwar ek son maniyèr war la vi dan l’éco-système la Rényon. Pa solman mont son gayar Natir, son manzé gabyé ek son zoli kafrine rob dentel su la plaj. Nou sa pa non pli ramass ban krak lékolonialis pinn an vèr pou lo plézir lo zié blan avèg dan sanktièr touristik.
Pou in tourism indépandan é révolisionèr
- Na ban sizé i fo sirtou pa kozé isi la Rénion : ban réparasion, lindépandans… Tousa zinterdi an missoukant, an pante, ou va gyin koz sanb nou an pé, dan la monté.
- Pou soign kiltir la rényon, nou tash maniyèr sort dan tout kalité folklor-klishé kiltirel.
- Nou shanj jamé lo péizaj an plas, na pwin zinstallation matériel su lo sentiyé. Nou préfèr rann omaj lo natir olerk exploit ali. Akoz si li, li néna super-pouvoirs pou soign nout boubou, anou osi nou gyin fé d’zaffer valab, nou gyin lir rant lé lignes pou galiz in ot réalité, donn ali la fors é èm ali plis ankor !
- Soman lé bien zoli rann omaj la natir, mé lo problèm zordi dan lo tourisme rényoné, ou sinon sa l’écolozi, zot i fé zamé in kont samb lo zabitan, son zistwar ek son maniyèr war la vi. Komsik lo Moun i fé zamé parti l’éco-système ! Alé marsé don ! Pou nou tousala i fé in mayaz extraordinaire, ou sa lo lien rant la Natir, lo Moun, ek l’Istwar lé puissan minm. Lo lien la lé mystik, danzéré, sa minm nou vé fé santir azot : l’âme la Rényon !
Lo ban zartis ek ki nou la travay
Emmanuel Tréport, Baptiste Clément, Olivier Cadet, Kristof Langromme, Sully Andoche, Jean-Luc Trulès, Natacha Praene, Ti Zan, Benjamin Clément.
Partenaires
Soutien Région Réunion – Aide à l’équipement